bolne ka nahin chup rahne ka man chahta hai
aise haalat mein tu lutf-e-sukhan chahta hai

ek to ruh bhi kafur-sifat hai apni
aur ab jism bhi be-dagh kafan chahta hai

main wafaon ka parastar hun lekin mujh se
mera mahbub zamane ka chalan chahta hai

tu idhar kaise are chandni surat wale
ye wo dhanda hai jo aankhon mein jalan chahta hai

wasl ke baad bhi puri nahin hoti khwahish
aur kuchh hai jo ye nadida badan chahta hai

sune sune se hain lafzon ke shiwale 'kashif'
aisa lagta hai ki izhaar badan chahta hai