husn hai mehrban tajjub hai
phir bhi hum bad-guman tajjub hai

aamad aamad thi mausam-e-gul ki
jal gaya aashiyan tajjub hai

jo bhatakte the pahunche manzil par
kho gae karwan tajjub hai

garm thi kal to aish ki mahfil
aaj matam wahan tajjub hai

phul jhadte the har ghadi jin se
un labon par fughan tajjub hai

tauba ki thi sharab-khane se
aa gae phir yahan tajjub hai

ku-e-jaanan ki sar-zamin jaise
ban gai aasman tajjub hai