daman pe rang-e-lala-o-gul aana chahiye
dil khun ho ke aankhon se bah jaana chahiye

mere sukut hi ka sahi zikr ku-ba-ku
logon ko ek shaghl ek afsana chahiye

aae wo aarzu ho jise did ki magar
mahfil mein us ki jaan ka nazrana chahiye

ab ban gaya hai dard hi wajh-e-sukun-e-dil
ab mujh ko dard-e-dil ka mudawa na chahiye

phir dil ko hai usi khalish-e-tir ki talab
phir wo nigah-e-nargis-e-mastana chahiye

'qasid' safar ka azm hi jab tum ne kar liya
phir hadsat-e-rah se na ghabrana chahiye