bujhi bujhi hui aankhon mein goshwara-e-khwab
so hum uthae hue phirte hain khasara-e-khwab

wo ek charagh magar hum se dur dur jala
hamin ne jis ko banaya tha istiara-e-khwab

chamak rahi hai ek aawaz mere hujre mein
kalam karta hai aankhon se ek sitara-e-khwab

main ahl-e-duniya se masruf-e-jang ho jaun
ki pichhli raat mila hai mujhe ishaara-e-khwab

ajab nahin meri ninden bhi jal uthen is bar
daba hua mere bistar mein hai sharara-e-khwab