bujhi nahin abhi ye pyas bhi ghanimat hai
zaban pe kanton ka ehsas bhi ghanimat hai

rawan hai sans ki kashti isi ke dhaare par
ye ek tuti hui aas bhi ghanimat hai

nishan numu ke hain kuchh to bisat-e-sahra par
jhulasti jalti hui ghas bhi ghanimat hai

phir is ke baad tumhaari shanakht kya hogi
riwayaton ki ye bu-bas bhi ghanimat hai

wo ab bhi milta hai apni ada-e-khas ke sath
ki waza-dari ka ye pas bhi ghanimat hai