buri zaminon ke faslon ko mitate rahna
main laut aaunga mujh ko wapas bulate rahna

ye gard-baadon ka masala hai ki mashghala hai
hawa ke daman pe daere se banate rahna

teri talab ke alawa apna koi nahin hai
qarib aa kar bhi kuchh na kuchh dur jate rahna

tumhaari aankhen to zindagi se bhari hui hain
hamare jaison ka hausla bhi badhate rahna

wo nazm jis ko padha nahin tha jiya tha hum ne
koi bhi rut ho bahaar aai sunate rahna

visal kya hai supurdagi ka kamal kya hai
badha-chadha kar saheliyon ko batate rahna

nazar bhi rakhna mohalle walon ki zindagi par
kabutaron ko bhi dana-wana khilate rahna

bichhadna chaho to apne dil ki nafi na karna
yahi bahut hai jahan raho muskuraate rahna

ye ped wo hain jo aasmanon ko saya denge
jo ho sake to dua ke paude lagate rahna

hamari duniya mein hairaton ki bahut kami hai
ye aag andar se bujh rahi hai jalate rahna