burida gesuon mein aankh ka rasta nahin tha
wo chehra khubsurat tha magar dekha nahin tha

main jab sahil pe utra khalq meri muntazir thi
kai din ho gae the baadshah milta nahin tha

bulate the hamein injir aur zaitun ke phal
magar wadi mein jaane ka koi rasta nahin tha

tana yaqut ka shakhen zamurrad ki bani thin
samar lal-o-gohar the nakhl ka saya nahin tha

paron mein aaine minqar mein taj-e-shahi tha
parinda qaf se aaya magar udta nahin tha