phir na kuchh baqi nishan mera rahe
kuchh rahe to bas bayan mera rahe

jo jigar se uth raha hai dam ba dam
baad mere wo dhuan mera rahe

koi chaarasaz koi gham-gusar
bas ki aisa raaz-dan mera rahe

main jiyun jitna jiyun sab ke liye
zindagi ka yun ziyan mera rahe

aabiyari main lahu se kar raha
bin khizan ke gulistan mera rahe

tum siwae man ke ghar ke le lo sab
bas wo tuta sa makan mera rahe

ye bhi mumkin ho sake 'hasrat' bhala
taron ke bin aasman mera rahe