butan-e-khisht-o-sang se kalam kar ke aa gaya
ki main tumhaare shahr mein bhi sham kar ke aa gaya

wahan kisi ko yaad bhi nahin tha mera nam tak
jahan main apni zindagi tamam kar ke aa gaya

gali mein khelta hua mila tha apna bachpana
jise main hasraton bhara salam kar ke aa gaya

tumhaara nam phir kured kar udas ped par
khizan mein fasl-e-gul ka ehtimam kar ke aa gaya

takallufat mein guzar gai hayat-e-sarhadi
ki jaise ajnabi ke ghar qayam kar ke aa gaya