chaak ho parda-e-wahshat mujhe manzur nahin
warna ye hath gareban se kuchh dur nahin

sajde karne se mita khatt-e-jabin ai zahid
hum kahe dete hain qismat mein teri hur nahin

mohtasib mane'-e-'illat hai guman-e-mai se
sunghne ko bhi mayassar mujhe angur nahin

lab tak aai thi shikayat ki mohabbat ne kaha
dekh pachhtaega khamosh ye dastur nahin

raat din nama-o-paigham kahan tak honge
saf kah dijiye milna hamein manzur nahin

tum ne di kohkan-o-qais se mujh ko nisbat
koi diwana nahin main koi mazdur nahin

kya kare 'dagh' koi us ki mohabbat ka ilaj
wo kaleja hi nahin jis mein ye nasur nahin