chaara-e-kar hua had se siwa ho jaana
ab mere dard ko aaya hai dawa ho jaana

hum samajhte hain yahi kun-fayakun ka hasil
ek khamoshi se tabassum ki ada ho jaana

zindagi ka yahi rishta hai musibat ka sabab
sans ukhadna girah-e-dil ka hai wa ho jaana

ai dua mujh se shikayat hai jafa-karon ko
tujh se ye kis ne kaha tha ki gila ho jaana

ai ajal sham-e-sifat soz-e-mohabbat ke tufail
aa gaya hai hamein aap apni qaza ho jaana

bhul jaana na meri aah ko han yaad rahe
un ke kuche mein agar tera saba ho jaana

ye batane ki nahin baat jatane ki nahin
khud-ba-khud chahiye izhaar-e-wafa ho jaana

sikhiye lutf ki kamyab ise kahte hain
kis ko aata nahin duniya mein khafa ho jaana

jabr par sabr ko aasan na samajh banda-e-aql
kaam himmat ka hai raazi-ba-raza ho jaana

meri aahon se jo tufan-e-sharar utha tha
bijliyan sikh gain us se bala ho jaana

ek musibat hai musibat ki tamanna 'shakir'
ek bala ho gaya himmat ka bala ho jaana