dayar-e-husn ki hangama-samani nahin jati
pareshan kar-e-ulfat ki pareshani nahin jati

musallam hain hazaron dastanen husn ko lekin
wahan jo aashiqi ki baat ho mani nahin jati

qubul-e-tauba-o-afw-e-gunah sab kuchh sahi lekin
kabhi na-kardani ki khud pashemani nahin jati

mohabbat wo musibat hai ki jis par bas nahin chalta
ba-asani ye aati hai ba-asani nahin jati

meri taswir-e-wahshat le ke ab ahbab kya lenge
ye diwane ki surat hai jo pahchani nahin jati

shab-e-gham mand pad jati hai jab mahfil sitaron ki
hamare dagh-ha-e-dil ki tabani nahin jati

gareban-chaak sahra-gard shorish qaidi-e-zindan
bahar-surat junun ki fitna-samani nahin jati

qayamat ke siwa kya hoga us ki be-hijabi mein
ki jis ki ek jhalak se dil ki hairani nahin jati

na bol is par hawa-e-dahr ki ek lahr hai ye bhi
hansi aai to kya gul ki pareshani nahin jati

hazaron yas-o-hirman dard-o-gham ka hai hujum is mein
mere wahshat-kade ki phir bhi virani nahin jati

mohabbat 'shakir' apne sath aah-o-girya lai hai
meri aadat hai ye aadat ba-asani nahin jati