chahaton ka samar mil gaya
tujh sa ahl-e-nazar mil gaya

tu mujhe rah mein kya mila
ek jawaz-e-safar mil gaya

ek shuur-e-mohabbat hamein
tere zer-e-asar mil gaya

tere mear ka to nahin
han magar chaaragar mil gaya

meri takmil hone lagi
wo sarapa hunar mil gaya

tum sambhaalo ye diwar-e-zar
aadamiyat ka dar mil gaya

dil mein jagi thi us ki lagan
ta-ba hadd-e-nazar mil gaya

tu mila to thakan jag uthi
yun laga jaise ghar mil gaya