chali jo piya ki gali dhire dhire
meri aankh kyun nam hui dhire dhire

ubharta gaya mujh mein wo lamha lamha
main tahlil hoti gai dhire dhire

na baisakhiyon ka sahaara liya hai
main panw pe chalti rahi dhire dhire

do-pahren makanon mein phaili hui hain
mein sae si badhti hui dhire dhire

mera zabt badhta chala ja raha hai
main parchhain man ki bani dhire dhire

teri yaad bhi jaise aari hai koi
mere dil pe chalti hui dhire dhire

hawa-e-zamana mukhalif thi lekin
main parwaz karti rahi dhire dhire