chalo ab waqt ko bhi waqt de kar dekh lete hain
kahan par kaun hai kis ka ye khugar dekh lete hain

hamein aankhon hi aankhon se abhi kuchh baat karni hai
zara sa rok kar in mein samundar dekh lete hain

duaen apne hisse ki sabhi to mang lin hum ne
bachi hain kis ke hisse ki ye andar dekh lete hain

yahan apne hi hisse ki jo khushiyan bantne aaya
hai itna kaun duniya mein tawangar dekh lete hain

kisi se bhi mohabbat kyon use ab ho nahin sakti
zamin dil ki kahan tak hai ye banjar dekh lete hain

zamin aur aasman ko hum zara khangal kar phir se
kahan par raqs karta hai qalandar dekh lete hain

raqibon aur yaron ko yahan 'nasir' bula kar hum
hai kis ki aastin mein aaj khanjar dekh lete hain