chamak kaisi rukh-r-anwar mein hai
zamana sara hi asrar mein hai

lagaen apne fan-paron ki qimat
ki ab har chiz hi bazar mein hai

kai aankhen gadhi jati hain mujh mein
koi rauzan dar-o-diwar mein hai

raha hun muntazir jis ka azal se
wahi chehra mere afkar mein hai

nahin pahla sa ab rang-e-bahaaran
ki virani gul-o-gulzar mein hai

hadis dil bayan kaise ho 'asi'
mujhe mushkil bahut izhaar mein hai