chaman chaman se rang-o-bu ki aaj wo phuwar uthe
nai bahaar aai hai nazar nazar pukar uthe

khizan ko bhi bahaar mein badal ke rakh den aaj hum
lahu chhidak den khak par chaman se jab ghubar uthe

sukut sahilon ka jo machal machal ke tod de
dil-e-khamosh-e-bahr se wo mauj-e-be-qarar uthe

khushi se kya ho us ghadi jo muskura ke tum kaho
khata mu'af ho gai nigah-e-sharmsar uthe

jale to zindagi ke raste hi mein ye dil jale
hamare dil se 'sham bas sada yahi pukar uthe