chaman mein jab bahaar aai to diwane machal utthe
hua jab zikr-e-chashm-e-mast paimane machal utthe

hawa-e-fasl-e-gul aai ghata ghanghor jab chhai
chala yun daur-e-paimana ki maikhane machal utthe

yaqinan rabt-e-baham koi husn-o-ishq mein hoga
jali jab shama mahfil mein to parwane machal utthe

pilae ja are saqi agar kuchh bhi hai mai baqi
teri dariya-dili dekhi to mastane machal uthe

kisi jaan-e-wafa ka tazkira unwan-e-mahfil hai
bahaaren jhum utthin aur afsane machal uthe

kuchh is andaz se zindan mein paigham-e-bahaar aaya
ki diwane to diwane the farzane machal utthe

chale ahl-e-junun josh-e-junun mein jab bayaban ko
kiya kanton ne istiqbaal virane machal utthe

barahman mast hota hai faqat naqus ki lai par
suni bang-e-azan tasbih ke dane machal utthe

mere ikhlas-o-jazb-e-dil ki ye tasir hai 'anjum'
yaganon ka to kya kahna hai begane machal utthe