chandni raat mein taron ki kahani likkhi
jalwa-e-jaanan ki har ek nishani likkhi

ho ke hasil na hui aisi siyani likkhi
tum ko ek hajat-e-nakaam zabani likkhi

main ne har waqt naya dard saheja dil mein
us ne afsos meri baat purani likkhi

samne aa gaya duniya ke mohabbat ka bharam
baat jab nikli to apni hi jawani likkhi

narm-o-nazuk lab-o-lahja wo talaffuz ki mithas
har kahani mein yahi tarz-e-bayani likkhi

lafz khamosh hai ashkon ka labaada odhe
mauj-e-dariya ki nahin hum ne rawani likkhi

kab se likkha hi nahin kuchh bhi qalam se mere
likhne baitha to teri meri kahani likkhi

haal-e-dil apna koi dusra likhta kyun-kar
dastan apni thi so apni zabani likkhi