charagh-e-did jalao ki khwab larzan hain
dhuen se shoala jagao ki khwab larzan hain

koi ghazal koi naghma koi bahaar ka git
faza-e-gham ko sunao ki khwab larzan hain

hayat jabr-e-musalsal sahi magar us waqt
rabab-o-saz uthao ki khwab larzan hain

ba-nam-e-tishnagi lao koi dahakta ayagh
ye sard raat jalao ki khwab larzan hain

karam ka mehr-o-mohabbat ka zikr kya ab to
sitam ke naz uthao ki khwab larzan hain

ufuq pe zist ke hangam-e-arzu-e-visal
ka mahtab sajao ki khwab larzan hain

ye pul-siraat-e-tamanna ki sakht rahen hain
qadam sambhal ke uthao ki khwab larzan hain