charagh rakh ke darichon ke ru-ba-ru main ne
bana liya hai tera aks hu-bahu main ne

kisi nigah se ek lahr aane wali hai
suni hai raat samundar ki guftugu main ne

ye kaun aankh ke zindan mein qaid ho gaya hai
ye kis ke waste dil kar liya lahu main ne

nazar wajud tabassum juda juda kar ke
bikher rakkha hai khud ko hi chaar-su main ne

kai baras se sanbhaala hua hai 'mustahsan'
tumhaara zakhm kiya hi nahin rafu main ne