chashm-e-saqi ka jo ima ho gaya
rind-e-mai-kash shaikh sana ho gaya

mar gaya main ab to hat puri hui
lo meri jaan ab to kahna ho gaya

har giran jaan ko hi shauq-e-jins-e-dard
kis qadar sasta ye sauda ho gaya

aafat-e-jaan teri qahr-aluda chashm
rahat-e-jaan tera hansna ho gaya

kuchh na dekhi hum ne tasir-e-fughan
rote rote ek zamana ho gaya

aa gai jab yaad us bedard ki
dard sa ek dil mein paida ho gaya

aamad aamad se mere saffak ki
hashr mein ek hashr barpa ho gaya

dil uda kar le gai us ki nazar
wo pari-ru muft ruswa ho gaya

dekh kar aaina wo but ban gae
mujh se badh kar un ko sakta ho gaya

'hasrat'-e-diwana dil de kar unhen
ek zamane ka tamasha ho gaya