chehre pe mere rang pareshaniyon ka hai
dariya mein sara zor hi tughyaniyon ka hai

khud rahbaran-e-qaum hain aalaishon mein gum
hum se magar mutaliba qurbaniyon ka hai

ahbab mere is tarah mujh par hain tana-zan
jaise khulus nam hi nadaniyon ka hai

sahil jo kat ke girte hain dariya ki god mein
kya ye qusur bahte hue paniyon ka hai

insan nahin hai koi bhi sae zarur hain
manzar har ek shahr mein viraniyon ka hai

kuchh khauf-e-ehtisab na sud o ziyan ka dar
ye faeda to be-sar-o-samaniyon ka hai