chehre se zindagi ki chamak khatm ho gai
itna hanse ki sari lalak khatm ho gai

har rasta kahin na kahin jata hai magar
chalta gaya main aur sadak khatm ho gai

mujh se chhuda ke hath bahut khush hai wo magar
khush-rang chudiyon ki khanak khatm ho gai

kis sang-dil khayal ne sahma ke rakh diya
yak-lakht aaine ki chamak khatm ho gai

phulon ki dilkashi mein izafa hua to hai
lekin ye kya hua ki mahak khatm ho gai

shakh-e-gulab lagti hai dali babul ki
mausam ke sath sari lachak khatm ho gai

aaj us ka main ne aakhiri khat bhi jala diya
'masum' umr bhar ki kasak khatm ho gai