chhodta mujh ko na bismil wo magar chhod diya
sar pe ehsan rahe is liye sar chhod diya

tukde tukde kiya naseh ka gareban main ne
shukr hai us ne mera daman-e-tar chhod diya

kaam sab khana-kharabi ke hue hain tujh se
rahm kha kar tujhe ai dida-e-tar chhod diya

phir kahan tha na yahan tha na wahan tha wo shokh
daman us ka jo sar-e-rahguzar chhod diya

le gai thi tere diwane ko ghar se wahshat
nahin ma'lum ki jangal mein kidhar chhod diya

'dagh'-e-warafta-tabiat ka thikana kya hai
khana-barbaad ne muddat hui ghar chhod diya