chhupana bhi jo tum chaho mohabbat chhup na paegi
diya dil mein jalega aur chamak chehre pe aaegi

hudud-e-inkisari se bhi hum aage nikal aae
agar tum aur khinchoge to rassi tut jaegi

samaat mein to apni quwwat-e-ehsas paida kar
mere dil ke tadapne ki tujhe aawaz aaegi

zarurat ko jakad kar sabr ki zanjir mein rakhna
nahin to bhuk khuddari ko ek din bech khaegi

tu apne ap ko suraj bana kar pesh kar pahle
bas ek main hi nahin duniya tere chakkar lagaegi