dar ke jine se to behtar mera mar jaana hai
ku-e-jaanan se guzarte hue ghar jaana hai

mere haq mein koi nindon ki duaen kar de
mujh ko khushiyon ke liye khwab nagar jaana hai

kyon na aankhen meri rone pe kamar-basta hon
aaj us ne mere ashkon ko guhar jaana hai

is liye naz hai dariyaon se nisbat rakh kar
un ka anjam samundar mein utar jaana hai

jis ko marna hai mere bhid mein rah kar 'anjum'
ho jahan taza hawa tujh ko udhar jaana hai