chhupe hue hain sar-e-rah sau khatar khamosh
chale chalo mere yaran-e-ham-safar khamosh

faza-e-qarya tilism-e-sukut mein gum-sum
siyah raat ke daman mein baam-o-dar khamosh

hamare ba'd agar rustakhez ho bhi to kya
bisat-e-waqt se hum to gae guzar khamosh

ba-in nawazish-e-mausam shaguft-e-gul pe na ja
zaban-e-haal se goya ba-chashm-e-tar khamosh

jo arsh-e-jah sitara-shikar the un ko
falak ki aankh ne dekha faganda-sar khamosh

har ek daur mein gunji hai zarbat-e-farhad
kabhi bhi rah na sake sahab-e-hunar khamosh

zaban-daraaz 'ziyai' ko rokiye sahab
ye maslahat ka taqaza hai al-hazar khamosh