chhuriyan chalin shab dil o jigar par
lanat hai is aah-e-be-asar par

baalon ne tere bala dikha di
jab khul ke wo aa rahi kamar par

name ko mere chhupa rakhega
tha ye to guman na nama-bar par

phirte hain jharokon ke tale shah
us ku mein umid-e-yak-nazar par

kya jaga hai ye bhi hijr ki shab
zardi si hai kyun rukh-e-qamar par

phir ghairat-e-ishq ne bithae
darban shadid us ke dar par

rahti hain ba-waqt-e-girya aksar
do ungliyan apni chashm-e-tar par

hai ishq sukhan ka 'mushafi' ko
mail nahin itna sim-o-zar par