dagh-e-dil gham ki tapish se yun sar-e-sham jale
apni nakaami pe jaise koi nakaam jale

un ke jalwon ki chamak hai ki dahakte shoale
dekhne wale ye samjhe ki dar-o-baam jale

junhi saqi ne meri samt badhaya saghar
mai-kade mein kai rindan-e-tahi-jam jale

yun jala karta hai dil mein teri furqat ka charagh
jaise turbat pe koi shama sar-e-sham jale

ahl-e-irfan ko parastar-e-mohabbat pa kar
aatish-e-rashk-o-hasad mein kai asnam jale

baat kahne ki nahin phir bhi kahe dete hain
hum tere gham se kabhi subh kabhi sham jale

dekh kar 'basit'-e-khuddar-tabiat tujh ko
kya tajjub hai agar gardish-e-ayyam jale