dair se kabe ko darte hue hum jate hain
dekh leta hai jo koi wahin tham jate hain

aap ne ghar se nikala hamein hum jate hain
phir na aaenge kabhi kha ke qasam jate hain

be-khata sar mere qasid ka qalam hota hai
ghair ko tohfe mein ban ban ke qalam jate hain

dil ka kya haal kahun subh ko jab us but ne
le ke angdai kaha naz se hum jate hain

hazrat-e-'dagh' ye hai kucha-e-qatil uthiye
jis jagah baithte hain aap to jam jate hain