daman-e-dil hai tar tar apna
kaam kar hi gai bahaar apna

jab se taskin de gaya hai koi
aur bhi dil hai be-qarar apna

dekh kar bhi unhen na dekh sake
rah gaya shauq-e-intizar apna

justuju aa gai sar-e-manzil
rah gaya rah mein ghubar apna

wo nazar phir gai to kya hoga
us nazar tak hai e'tibar apna

is ki har jumbish-e-nazar ke sath
rukh badalti gai bahaar apna

har-nafas hai unhin ki yaad 'iqbaal'
gham hai kaisa sada-bahaar apna