daman ki fikr hai na gareban ki fikr hai
ahl-e-watan ko fitna-e-dauran ki fikr hai

gulshan ki fikr hai na bayaban ki fikr hai
ahl-e-junun ko fasl-e-bahaaran ki fikr hai

logon ko apni fikr hai lekin mujhe nadim
bazm-e-hayat-o-nazm-e-gulistan ki fikr hai

hum maqtal-e-hayat mein hain sar-ba-kaf magar
ahl-e-hawas ko apne dil-o-jaan ki fikr hai

sahil se dur rah ke hai manzil ki justuju
maujon ki fikr hum ko na tufan ki fikr hai

hum ko nahin hai fikr kisi baat ki 'niyaz'
tarikiyon mein sham-e-farozan ki fikr hai