dard-e-firaq dard-e-tamanna liye hue
duniya se ja raha hun main duniya liye hue

hun dil mein ek teri tamanna liye hue
ya hun tamam ishq ki duniya liye hue

aksar utha hun dost ki mahfil se is tarah
aankhon mein ashk ashkon mein dariya liye hue

duniya mein rah ke bhi hai wo duniya se be-niyaz
jo hai tere khayal ki duniya liye hue

shan-e-khulus-e-sajda ke qurban jaiye
utthi jabin to naqsh-e-kaf-e-pa liye hue

milta hai kya jawab teri bargah se
aaya hun lab pe harf-e-tamanna liye hue

sahra mein kat rahi hai agar zindagi to kya
aankhon mein hai bahaar ka naqsha liye hue

un ka ilaj kaun kare bas tere siwa
hain jitne zakhm dil mein masiha liye hue

ab jo bhi bazm-e-dost mein pesh aae ai 'kamal'
jata hun dil mein dil ka taqaza liye hue