dard ki intiha nahin malum
hashr kyunkar utha nahin malum

kaun hai aashna nahin malum
kaun dega dagha nahin malum

wo to rukhsat hue gale mil kar
kab talegi bala nahin malum

ai masiha mera ilaj na kar
tujh ko meri dawa nahin malum

doston ka khulus yaad raha
dushmanon ki ada nahin malum

phul murjha gae gulistan ke
kaisa jhonka chala nahin malum

kis ko main ba-wafa kahun 'maikash'
kaun hai ba-wafa nahin malum