dariya-dili ki sun ke main aaya tha aas mein
do ghunt bhi mile na samundar ke tas mein

pir-e-mughan ka nam na badnam ho kahin
jitni ho aaj dal de saqi gilas mein

izzat se hai waqar zamane mein dosto
izzat nahin to kuchh nahin bashari asas mein

mushkil mein hauslon ka sahaara agar na ho
aata nahin shuur dil-e-bad-hawas mein

apnaiyat khulus wafa rabt-e-bahami
sab kuchh milega tum ko gharibon ke pas mein

'fani' daba na sozish-e-qalb-o-jigar ko yun
chingariyan chhupata hai koi kapas main