darmiyan koi fasla bhi nahin
meri chahat wo jaanta bhi nahin

zindagi se koi gila bhi nahin
aur jine ka hausla bhi nahin

har taraf kyon usi ka charcha hai
hae wo shakhs jo mila bhi nahin

dil dhadakne ka silsila bhi nahin
aur muddat se kuchh kaha bhi nahin

waqt dekho kahan pe le aaya
ab yahan koi rasta bhi nahin

tum ne jo kuchh suna suna bhi nahin
main ne jo kuchh kaha kaha bhi nahin