dasht-e-hayat surat-e-sahra dikhai de
milon koi shajar hi na saya dikhai de

kyon shisha-e-khayal na dhundla dikhai de
jab aks tutta hua tara dikhai de

mahrumiyon ki dhund hai nazron ke samne
kaise nigar-e-waqt ka chehra dikhai de

hadd-e-nazar hai sirf sarabon ka silsila
har lab pe ek pyas ka sahra dikhai de

upar se yun to khud ko samete hue hain log
andar se har wajud bikharta dikhai de

har ped par itab hai kin mausamon ka aaj
shakhon pe koi phul na patta dikhai de

'jauhar' talash-e-zat se irfan-e-zat tak
apni ana ka aks har ek ja dikhai de