dasht-e-talab mein kab se akela khada hun main
jis ka nahin jawab koi wo sada hun main

kis ki talash hai mujhe apne wajud mein
wo kaun kho gaya hai jise dhundhta hun main

ye main ne kab kaha tha ki thahro mere liye
dekha to hota mud ke kahan rah gaya hun main

hai kis ka intizar tujhe rah-e-raftagan
teri hadon se dur bahut ja chuka hun main

muddat ke baad laut ke ghar aa gaya to hun
ab sochne laga hun koi dusra hun main