dastan ishq ki anjam tak aa pahunchi hai
baat ab hasrat-e-nakaam tak aa pahunchi hai

jaane kya haal ho rindan-e-bala-nosh ka ab
mai-kashi durd-e-tah-e-jam tak aa pahunchi hai

baat phaili hai tere zulm ki shahron shahron
dastan teri mere nam tak aa pahunchi hai

jaane kis rah se laya hai mujhe zauq-e-talab
justuju gardish-e-ayyam tak aa pahunchi

ek nai subh ka bhi zikr hai aane wala
guftugu waqt ki ab sham tak aa pahunchi hai

shikwa-e-tishna-labi khair ho maikhane ki
bhid ab saqi-e-gulfam tak aa pahunchi hai

sochte kya ho umar aa ke qarib-e-manzil
baat ab jurat-e-do-gam tak aa pahunchi he