daur-e-khizan mein jashn-e-bahaaran dikhai de
ab chaak chaak apna gareban dikhai de

kab tak rahenge sahil-o-tufan ke darmiyan
kab tak ye zindagi hamein zindan dikhai de

mere khuda saza-o-jaza ab yahan bhi ho
ye sarzamin bhi adl ka unwan dikhai de

is daur-e-gumrahi ki zarurat hai nuh ki
sahil-ba-dast phir wahi tufan dikhai de

'manzar' main thak chuka hun yahi dhundte hue
is daur-e-na-shanas mein insan dikhai de