dayar-e-ghair mein apne dayar ki baaten
hon jaise ahd-e-khizan mein bahaar ki baaten

jahan-e-ishq mein ahl-e-dimagh mat dhunden
sukun-e-qalb ki baaten qarar ki baaten

hazar fitnon ka maskan hai sina-e-adam
rumuz-e-ahrman-o-kirdgar ki baaten

kashakash-e-ghame-duniya se jab milegi najat
karenge gesu-o-rukhsar-e-yar ki baaten

mera dimagh bhi majbur dil bhi hai majbur
main kis zaban se karun ikhtiyar ki baaten

'qamar' hamin se hain sher-o-adab ke hangame
karoge yaad gharib-ud-dayar ki baaten