dekhta tha main palat kar har aan
kis sada ka tha na jaane imkan

us ki ek baat ko tanha mat kar
wo ki hai rabt-e-nawa mein gunjaan

tuti bikhri koi shai thi aisi
jis ne qaem ki hamari pahchan

log manzil pe the hum se pahle
tha koi rasta shayad aasan

sab se kamzor akele hum the
hum pe the shahr ke sare bohtan

os se pyas kahan bujhti hai
musla-dhaar baras meri jaan

kya ajab shahr-e-ghazal hai 'bani'
lafz shaitan sukhan be-iman