den dida-e-khush-khwab ko tabir kahan tak
ai waqt tere jabr ki tauqir kahan tak

kab tak ki kaho jazba-e-tamir ko takhrib
ai ahl-e-safa jhut ki tashhir kahan tak

ab dost banane ka hunar bhi zara sikhen
ki ja-e-mah-o-najm ki taskhir kahan tak

ai shahr-e-ana tere farebon ke bharam mein
aaina-misalon ki ho tahqir kahan tak

har aan koi mujh mein naya tut raha hai
aakhir koi khud ko kare tamir kahan tak