deta hai mujh ko charkh-e-kuhan bar bar dagh
uf ek mera sina hai us par hazar dagh

dete hain mere sine mein kya hi bahaar dagh
khae na un ko dekh ke kyun lala-zar dagh

lala karega dil ki mere kya barabari
us par hai ek dagh yahan be-shumar dagh

duniya ke sare sadme hain kam hijr-e-yar se
de muddai ko bhi na ye parwardigar dagh

rakhta hai ishq-e-lala-rukhan dil mein wo nihan
sine pe mahtab ke hai aashkar dagh

zulmat se di najat dil-e-daghdar ne
raushan misal-e-shama hai zer-e-mazar dagh

har dam na kyun lagae rakhen sine se use
ek mah-ru ke ishq ki hai yaadgar dagh

qatil mere lahu ne bhi kya gul khilae hain
daman pe tere dete hain kya hi bahaar dagh

jo zulm chahe rakh dil-e-'ranjur' par rawa
de tu magar use na judai ka yar dagh