dhuan hi dhuan shah-rahon mein tha
mera shahr shoalon ki banhon mein tha

haya ka zara shaiba tak nahin
kisi ki nashili nigahon mein tha

bade pyar se aaj mujh se mila
jo hail kabhi meri rahon mein tha

ba-zahir to tha wo farishta-sifat
magar mere jhute gawahon mein tha

mili be-gunahi ki us ko sanad
jo duba sarapa gunahon mein tha

'kamal' aaj wo bhi harifon mein hai
jo barson mere khair-khwahon mein tha