dhund leta hun wajah koi nibhane ke liye
warna baaten hain kai chhod ke jaane ke liye

tere message ko sanbhaala hai badi muddat se
dil machal jae to auqat dikhane ke liye

wo jo be-nam sa ek rabt tha ab khatm karen
khat ke auraq nikale hain jalane ke liye

tu ye samjhe ki asar dil pe nahin hota hai
jab ki phir maut to ibrat hai zamane ke liye

hum the khuddar so gumnam rahe sari umr
log kam-zarf bane nam kamane ke liye

jab tere shahr mein ushshaq ka majma hoga
hum bhi aaenge wahan sher sunane ke liye

thokaren kha ke jo sajde mein gira itna kaha
mazarat mere khuda der se aane ke liye