dhundne khud hi chala aata sukun-e-dil mujhe
hae-qismat tu ne rakha bhi kisi qabil mujhe

iztirab-e-shauq kahta hai abhi chalte raho
de rahi hai dawat-e-khatm-e-safar manzil mujhe

main to ye tai kar chuka tha ab na aaunga magar
khinch laya teri jaanib iztirab-e-dil mujhe

jalwa wajh-e-be-khudi o shauq wajh-e-iztirab
mutmain hone nahin deti koi mushkil mujhe

bahr-e-ulfat mein meri nakaamiyan uf al-aman
dhundhta hun har taraf milta nahin sahil mujhe

uf kisi karwat qarar aata nahin sham-e-alam
kar diya hai dard-e-dil ne is qadar bismil mujhe

rang lana tha na laya mera khun-e-arzu
hashr mein hona pada sharminda-e-qatil mujhe

phir usi pur-kaif aalam ki hai mujh ko justuju
phir wahi naghma suna de ai nawa-e-dil mujhe

khul na jae raaz-e-ulfat ahl-e-mahfil par kahin
aap rah rah kar na dekhen yun sar-e-mahfil mujhe

aa gae ashk-e-nadamat un ki aankhon mein 'faza'
dekhiye ab kya dikhae jazba-e-kaamil mujhe