husn-e-tamasha dost chhupe kyon hijab mein
sau jalwe runuma hain kisi ke naqab mein

ai kaif-e-be-khudi mujhe le ja usi jagah
hain sar-ba-sajda sainkadon jis ki janab mein

ai dard thahr thahr meri justuju ko dekh
main un ko dekhta hun hazaron naqab mein

har maut ka hai raaz-e-nihan zindagi dawam
har zindagi bahaar hai khana-kharab mein

ban ban ke hai bigadne mein ek shan-e-dilbari
ek taza zindagi hai har ek inqalab mein

mar mar ke hum ne martaba hasil kiya hai ye
rang-e-shabab laya hai bachpan hijab mein

dariya mein aaj kis ka safina hua tabah
kyon dabdabae ashk ye chashm-e-habab mein

ai jazb-e-shauq thahr na badh tu hudud se
raaz-e-nihan ayan na ho chashm-e-pur-ab mein

'sayyad' ye ishq aur hasinon ki mahfilen
sab khwab hai jo dekh rahe ho shabab mein