dibacha-e-kitab farishte se kho gaya
mazmun-e-an-janab farishte se kho gaya

tahrir jo kiya tha hamare sawal par
yazdan ka wo jawab farishte se kho gaya

hum ko payambari ki bashaarat nahin mili
ilham ka wo khwab farishte se kho gaya

sarzad hui thin nashshe mein hum se bhi nekiyan
wo daftar-e-hisab farishte se kho gaya

kausar se bhar ke saqi ne bheja tha hum ko jo
mashkiza-e-sharab farishte se kho gaya

aashiq ne koh-e-tur pe khoya hai hosh yun
mahbub ka naqab farishte se kho gaya

injil-e-pak mein to hamara bhi zikr tha
aayat ka wo bab farishte se kho gaya